TEKS KHUTBAH ‘IDUL ADHA 1433 H/2012 M
Judul : Neuleuman Hikmah ‘Idul Adha
Keur Ngaronjatkeun Iman Jeung Taqwa
Oleh : H. M. Najib Fauzy Lukman
Allohu Akbar ............ Allohu Akbar ....................
Saestuna sagala puji ngan wungkul Alloh anu kagunganana, dzat anu parantos
ngajantenkeun Ka’bah pikeun kiblatna manusa, sareng ngadikeun sholat lulugu
sagala Ibadah sarta Alloh dzat anu parantos ngawajibkeun ibadah haji sareng
umroh samata-mata lillahi ta’ala.
Nyumponan rukun khutbah, kawajiban khotib umajak sareng wasiat, hayu
babarengan ngajaga, ngariksa jeung ngaronjatkeun kataqwaan ka Alloh, sebab
jangji Alloh ngan wungkul jalma anu baris meunang kagampilan tina sagala
kesulitan anu disanghareupan ku menehna, jeung Alloh baris mere rizqi ka jalma
anu taqwa kalawan rizqi anu teu disangka ku manehna.
Tanggal 10 dzulhijjah ngarupakeun lebaran Haji, sajumlahna jama’ah
ngabalakakeun kabungah, ngaalewohkeun ka atoh tutas nohonan kawajiban wukuf di ‘arafah
tanggal 9 dzulhijjah salah sahiji rukun haji anu ngabedakeun umroh jeng haji
sarta waktu jeung tempatna ditangtukeun ku Alloh teu bisa sagawayah waktu.
Kaayaan jama’ah wukuf di ‘arafah aneprok diuk dina luhur hamparan keusik,
ditiungan ku moreretna panas panon poe, disimbutan ku hiliwirna angin tengah
poe dina kaayaan ihrom tegesna keur ngaharamkeun diri tina perkara anu dicaram
ku Alloh. Pikiran ngimpleng di alam dunya butuh ridlo Alloh jeung kabita ku
jangji Alloh syurga di alam akherat jaga.
Hate kumereb butuh kupitulung Alloh sabab hasilna maksud, kapimilikna
harta, kacangkingna kalungguhan, kahontalna cita-cita, rengsena pagawean,
leupasna tina hahalang, caheurna panyakit, sagala rupana estu anging kupitulung
Alloh sarta baris mawa kasalametan saupama pitulung Alloh dibareungan ku ridlo
Alloh SWT. Payus sok saupama Rosululloh SAW nyontoan do’a anu pihartieunana :
“yaa Alloh : Abdi neda Ridlo gusti
di dunya sareng syurga di akherat, sarta abdi nyalindung tina bebendu gusti di
dunya sareng naraka di akherat.”
Kusabab hal eta Alloh teu marentah kasajumlahna manusa sangkan pinanggih
jeung katenangan di alam dunya kiwari sarta bisa murak kabagjaan di akherat
jaga kajaba IBADAH tegesna salalawasna merenahkeun hirup jeung kahirupan di
tilaman ku niyyat dina hate moal migawe perkara kajaba anu diparentahkeun ku
Alloh, moal rek ngucap kajaba ucapan anu diparentah ku Alloh, moal aya anu
diarep-arep kajaba butuh ridlo Alloh sarta moal rek barang penta ka Alloh
kajaba neda kupitulung Alloh.
Sa’i salah sahiji rukun haji jeung umroh tegesna jigjrig bulak balik tujuh
balikan sntara shofa marwah ngebrehkeun ka sajumlah manusa nalika butuh rizqi
kaagungan Alloh, diparentahkeun ku Alloh usaha ngetrukeun kamampuan fikiran, tataga
pamere Alloh, sarta diparentahkeun ikhtiar tegesna milih usaha anu dipikaridlo
ku Alloh ulah nyieun peta atawa usaha anu dibenduan ku Alloh, lantaran manusa
geus dibere kaunggulan karunia akal jeung fikiran pikeun ngabedakeun mana anu
bener jeung mana anu salah numutkeun syare’at agama.
Sajeroning usaha boh dagang, tani, jeung pagawe kudu diniyatan rek kigawe
parentah Alloh, fikiran kudu tetep nganteng mihareup ridlo Alloh, hate tetep
butuh kupitulung Alloh. Nalika hasil maksud ulah takabur boga rasa hasilna
maksud, kahontalna cita-cita, untungna usaha ladang tapak pagawean sorangan,
poho atawa ngaleungitkeun kana af’alna Alloh.
Allohu Akbar.................. Allohu Akbar..........
Dawuhan Alloh anu pihartieunana :
”tuluy miang anjeun tina tempat
mariangna jalma-jalma (‘Arofah) prak menta pangampura ka Alloh, saestuna Alloh
anu lebar ku pangampura jeung kahemanna. Maka dimana aranjeun rengse nyumponan
ibadah haji, kudu ngalobakeun dzikir (eling) ka Alloh sakumaha aranjeun inget
ka Indung Bapa, malah kudu leuwih inget tibatan ka Indung jeung Bapa.”
Tiwanci maghrib mangsa peuting ngaganti miang beurang tanggal 9 dzulhijjah,
dzikir kalimah thayyibah takbir, tahlil, tahmid jeung takbir kebek minuhan
jagat raya parat nepika mangsana kalebat.
Allohu Akbar .................. walillaahil hamd.
Millah Nabi Muhammad SAW lempeng sajalan jeung millahna Nabi Ibrahim AS
diantara syare’at ibadah Qurban ngalanggeungkeun sifat tauhidna Nabi Ibrahim AS
anu kawentar panceg, pageuh sanajan kudu nandangan cocoba anu kacida beuratna. Kalimah
tauhid nyangreud pageuh dina kalbuna, panceg teu regrog jadi kayakinan sanajan
kudu nelasan Nabi Ismail AS putra anu kacida dipikameumeut tur dipikanyaahna.
Sifat rahman Alloh anu teu kedat, teu peugat, ka hambana gendat parat
nepika akherat nangtayungan Nabi Ibrahim AS leupas tina gotaan syetan,
nyalameutkeun raga Nabi Ismail sarta nangtayungan Siti Hajar dicupakeun tina
kasedih jeung kabingungna.
Geusan nembrakeun kaguligah manah, ngaalewohkeun kaatoh Nabi Ibrahim AS
cumpon taat nohonan parentah Alloh, bisa
ngungkulan panggoda syetan anu jadi musuh bubuyutana manusa, sarta digantina
Nabi Ismail ku gibas pitulung Alloh aranjeuna dzikir ngumandangkeun kalimah
thoyyibah “takbir, tahlil jeung tahmid.”
Allohu Akbar..............
Keur sajumlah ummat Rosululloh SAW anu boga rasa meunang kabungah ni’mat ti
Alloh diparentahkeun ku cara motong khewan dina poean ‘Idul Adha atawa poe
tasyriq kalawan niyyat Ibadah rek migawe parentah Alloh, teu aya anu
dihareupkeun kajaba mihareup ridlo Alloh jeung hate taqorrub butuh pitulung
Alloh.
Pamungkas, mangga urang sami-sami ngajaga paniyatan, matri katauhidan moal
aya anu diudag kamana wae ngalengkah kajaba butuh pitulung Alloh, teu aya anu
jadi hareupan dina manah, tur implengan dina fikir kajaba Ridlo Alloh.
Mudah-mudahan Alloh salamina ngaberkahkeun dina hirup jeung kahirupan
sarta ngajadikeun hamba-hamba anu sholeh.
Postingan
